والصلاة والسلام على رسول الله، صلى الله عليه وعلى آله وصحبه وسلم تسليماً كثيراً
بداية الفكرة : قبل 5 او 4 سنوات لما سويت المسرح اللي عندي كنت اتمنى اني اركب Rack (رفوف ) للمسرح
وسبحان الله بعد ماانتهيت من كل شي لقيت الرفوف اللي ابيها ...لكن خلاص ماعاد يمدي اعيد كل شي
رحت للمحل اللي شفت عندهم الرفوف وطلع مخلص ويمكن يجيبونه بعد شهرين او ثلاث فاصابني الإحباط
بتاريخ 10-06-2011 ومن ذاك الوقت والرف مركون عندي بالبيت لكثرة انشغالي ومافي اي فكرة مستقرة في مخيلتي للمسرح اللي مخطط عليه ...
راح استعرضها لكم من خلال الموضوع الشغل اللي سويته اخذ مني تقريبا شهر ونص لان الوقت ضيق جداً
ومن اهم الاسباب اللي خلت العمل هذا يطول ان شغل فردي ومتعب جداً جداً ...
والارضية ايضا غير مستوية تماماً... وكان شي ممل حتى اخلي المقاسات متساوية
الجدار المتعب اللي راح اركب عليه الديكور الجديد
لما اقول ان متعب فهو متعب بكل ما تعنيه الكلمة
الجدار هذا فاصل بين الصالة والغرفة ... سماكة الجدار الكلي تقريباً 10سم
مكون من الواح خشب سامكتها 4 مل فقط من الجهتين و مجوف من داخل بالفلين وقواعد خشب قوية
يعني الخشب ابو 4 مل لو اركب عليه مرايا نص متر في نص متر ماراح يتحمل...فما بالكم لو بركب شاشه 55 بوصة !!!!
الحل هو اني اعتمد فقط على القواعد الداخلية للجدار واكتشفت اماكنها + الأرضية
4 مل هذه كان مزعج جداً بما ان قديم فصار الجدار فيه تعرجات بسبب الحرارة وتمدد الخشب
الديكور راح يكون عبارة عن كتلة خارج الجدار في وسطه شاشة ومن الجوانب رفوف للسيديات
الرفوف سويتها عند النجار
اول خطوة سويتها اني رسمت الشكل اللي في بالي بالمقاسات على الجدار علشان اتخيل كيف بيكون الشغل
وللاسف ماخذيت له صورة
المهم اول شي ركبته كان هذا الخشب على الجدار
وبعدين ثبت الرفوف عليها
الخطوة اللي بعدها كانت تثبيت القواعد اللي بركب عليها الشاشة وهي راكبه على القواعد اللي داخل الجدار
وبعدين ركبت عمودين خشب عليه مقاس 2 في 3 انش
البركيت حق الشاشة + سلك الكهربا + قطعة الخشب اللي تحت علشان اثبت عليها سماعة السنتر + قواعد خشب على الرفوف تساعد في تثبيت الجبس بورد
مكان سماعة السنتر
هنا طلعت الكارتون اللي في الاسلاك اللي ابي امدها من خلف الديكور
سلك الــ HDMI <<<< تحس ان عقال مو سلك
مرحلة تمديد الاسلاك :-
عندي علبة كهربا وحدة
هي اقرب شي ممكن اخذ منها كهربا وابي اركب كل شي عندي عليها
لكن حبيت ادبل العلبة علشان قريب من العلبة بركب السابوفر وماودي اركب تحويلة
وكانت الصدمة لما فتحت العلبة
ان هذي العلبة موصلة مع كل العلب اللي بالصالة وبالغرفتين ... يعني لو اشغل الدفاية + الكواية + الاجهزة
اللي عندي الله اعلم ايش بيصير ... ولا الاسلاك هي تتحمل لو ماكان فيها هذي التفرعات
المهم قررت امد سلك جديد خاص بالمسرح من العداد نفسه ورحت شريت لي سلك محترم
ومديته من العلبة الى الجدار اللي فيه العلبة السابقة ومن حسن حظيان
الجدار اللي فيه العلبة يطل على الشارع يعني ماراح اتورط كثير
طريقة عمل العلبة في الجدار
اول شي نثبت العلبة على الجدار ونرسم شكل العلبة
وبعدين نستعين بصديقي في هذي العملية جهاز دريمل
ونقطع فيه على الخط بالشكل هذا
ثم نضربه بالازميل ونكسره
طبعاً العمق غير كافي لدخول العلبة
هنا نستعين بالدريل ونحط لصقة او أي شي على ريشة الدريل علشان نعرف العمق المطلوب للحفرة
وبعد الضرب والتكسير ... سويت حفرة صغيرة لو تلاحظونها بالصورة على الشارع علشان ادخل منها سلك الكهربا
بعد تركيب العلبة انصحكم تركبون علبة حديد افضل من البلاستك
طبعاً تقدرون في هذي الشغلة انكم تستغنون عن جهاز الدريمل وتكتفون فقط بالدريل
لكن اللي يميز الدريمل ان يخليكم تقصون بشكل مستقيم في البداية
نفس الفكرة بالنسبة لعلبة المسرح لكن هذي المرة على جدار الــ 4 مل وبالدريمل فقط
مرحلة تركيب الجبس بورد
بعد تركيب الجبس بورد
ركبت لوحين فوق بعض علشان يكون اقوى
الموضوع باقي في البداية
تم تعليق الشاشة والخطه اني اركب الشاشة ويكون من الجوانب متساوية مع الخشب
قطعت اللوح الخشب بالمقاس المطلوب ركبته في الجانب الايسر
وكان في مشكلة قبل مااقطع الخشب كنت حاطه في الحوش ... وفي الصباح الباكر وانا رايح للدوام
ولله الحمد يجي مطر ماشاء الله غزير جداً ويبلل الخشب ويتشبع بالماء
قلت مو مشكلة بقطع الخشب وبعدين بينشف وبركبه...قطعته وتعبني وانا احس ان في شي غلط
المهم الخشب بسبب المطر صار يقوم منه اجزاء وكان من ارخص الانواع بصراحه
وفكرت ايش بيكون مصيره بعد فترة من الزمان... فالله هداني وكلمت النجار وعطيته المقاسات
وقلت له ابي خشب من نوع اوك ... نوعيه قوية وممتازة مثل الرفوف وريحت راسي من التقطيع
الفرق بين الخشب الرخيص والممتاز (الاوك)
ركبت قطعة الخشب هذي على الخشب الجانبي علشان يغطي التجويف الداخلي للديكور (ايضاً وصيت النجار يقطعه)
بعد تركيب القطعتين
صورة من الدمار اللي كان حاصل عندي وكان اسوء من هذا بعد ...هذا بعد الترتيب
اتوقع الصورة بدت تصير اوضح من اول عن الديكور اللي مخطط له
الى هذي اللحظة انا ماقررت هل اصبغ ام اركب ورق جدران او الواح خشب جاهزة تركب بالصمغ
وبعد تفكير طويل قررت ان يكون ورق جدران لتوفر عدة اشكال والوان كثيرة ...
وكان متوفر عندي لفه بالون الابيض مزخرف سابقاً قلت بجرب اركبه واشوف كيف شكله
من قريب جميل لكن لما اجلس على الكرسي شكله ابيض كانه ورق المقوى حق المدارس
فرحت للسوق ودورت لمدت 3 ايام لين مالقيت لي نوع وقالوا ياخذ 3 ايام ويوصل ...
وبعد وصوله طلع اللون اللي طالبينه غلط وانتظر 3 ايام من جديد
الديكور من فوق ايضاً ماكنت عارف ايش اسوي فيه ...وقلت بقرر مصيره بعد ما اخلص وبعدين اتخيل
قررت في الاخير اني اركب رف خشب وتحته قطعة فلين يكون مايل
ورحت وخذيت الفلين
بعد تركيب الفلين فوق وتغيير الفرش (الزوليه) وبالصورة تلاحظون شكل ورق الجدران
اللي شريته وزحمة الاسلاك اللي مديتها واعتقد اتضح لكم مكان الرك (الرفوف)
حق المسرح وين بيكون موقعهوقبل ما ابداء في موضوع تركيب
ورق الجدران خلونا ننتقل للرك اولاً
العلب والاسلاك خلف الرك
صورة قديمه للرك قبل التركيب
خلف AV
الاسلاك داخل التري اللي بالرك من الخلف
تري ثاني فقط الاسلاك الكهربا
مكان الاسلاك داخل الرف من تحت
بخصوص تحويلة الكهربا اللي داخل الرف طلبته من امازون البريطاني علشان يناسب الكهربا اللي عندي
الي يميزه ان فيه power surge protection يحمي الاجهزة من أي تيار عالي او تقطيع بالكهربا
ويتحمل 13 امبير وهذا زيادة عن متطلباتي بكثير
الــAV من الخلف حبيت اسوي له تري لاسلاك الـ HDMI دورت في خرابيطي الكثيرة ولقيت هذي الحديدة
وقطعة البلاستك الخضرة
علمت عليا بالقلم وقطعتا بالدريمل وثبت قطع البلاستيك
وبعدين ركبتها خلف AV علشان تكون الاسلاك ارتب
لكن للأسف تم الاستغناء عنه بسبب ان المكان صغير ويحتاج مساحه اكبر حتى اقدر اثني الاسلاك HDMI
البنانا بلاج
البنانا بلاج اللي اخترته كان من خلال موضوع الاخ wwww-e
على هذا الرابط هـــــنــــــــــــا
خذيته من شركة GLS Audio وهذا رابط المنتج في الامازون
اضغط هــنـــــــــــا
اللي يميزه شكله جميل و انه يقبل اسلاك حتى حجم 10 AWG والاسلاك اللي انا مركبها 12 AWG
وايضاً راس البلاج يكبر ويصغر عن طريق لف الغطاء مثل البلاج اللي باللوان الاسود
مبين ان اكبر من الاحمر
طريقة تركيب السلك عجبتني كثير
لان تتثبت بالبراغي ... واحد يثبت لك سلك النحاس والثاني يثبت الجلدة
لكن فيه عيب كبير جداً
ان راس البنانا بلاج اللي تقدر تتحكم في حجمه غير متساويه احجامها تختلف
يعني مايدخل كله في السماعة او AV وحاولت بشتى الطرق... حتى اني فكيت البنانا بلاج الى قطع
وشلت المسمار المسؤل عن التكبير والتصغر لكن كانت نفس النتيجة
وبالصورة تلاحظون عدم تساوي البلاج
ولو ترجعون الى صورة AV فوق بالموضوع راح تلاحظون ايضاً عدم تساوي البلاجات
نرجع لموضوع الديكور وورق الجدران
تركيب ورق الجدران :-
اهي اول تجربة لي لتركيب ورق الجدران وتعلمتها عن طريق اليوتيوب
وبما ان هي اول تجربة لي ومافي احد يساعدني غير ايديني الله يحفظها 
بدأت الساعة 11 اخر الليل وو قفت الساعة 5 الفجر للصلاة وانا منتهي 6 ساعات
متواصلة وما خلصت كل شي + ساعتين بعدين متفرقة
اول شي كان اخذ المقاسات وتقطيع الاوراق
بعد التركيب
تم تضبيط مكان السماعة
بعد الانتهاء من كل شي
وهذي صورة بفلاش تبين الالوان اكثر
بعد التعب هذا يا اخوان انا مو راضي عن هذا العمل لسببين
الاول ورق الجدران جميل ... لكن صاير شكله بايخ مع لون الجدار
السبب الثاني الشاشة لو تلاحظون مايلة على تحت من جهة اليسار ومبين واضح
من فوق ان الفراغ جهة اليسار اكبر من اليمين رغم اني مركب كل شي بالملي
شيكت على الشاشة بالميزان طلع مضبوط 100% شيكت على الاخشاب اللي بالجوانب
لقيت المقاس مضبوط 100% وغير مايل ابدا ...طيب اجل وين المشكلة !!!
مع الإرهاق الجسماني والعقلي ماكتشفت المشكلة غير ثاني يوم ...
المشكلة ومافيها ان الارضية معووجة فعلشان كذا لما ركبت الرفوف الجانبية + الالواح اللي بالجانب الايسر صارت مرتفعة
ولما ركبت الفلين مع سقف الديكور اللي فوق صار معووج ويعطيك شعور ان الشاشه هي المعووجة
في الاخير قررت اني اشيل الاوراق واشوف شي ثاني افضل واقطع الخشب من فوق حتى يكون بمستوى واحد
وبما ان ذوقي العام رايح فيها باختيار الالوان خذيت المدام معاي وخليتها هي اللي تختار
تركيب اضاءة LED
ومن ضمن الاشياء اللي تم اضافتها اللي هي اضاءة LED
في الفجوات اللي بالجانب وطلبتها من الامازون
شريط الاضاءة + الريموت
محول اللي في الانفر ريد وسلك الكهربا ركبته داخل الديكور
موزع الكهربا الرئيسي للإضاءة
وحصلت لي مشكلة اثناء مافكيت الشاشة ... أني مسوي فيها قوي وانعوج معاي سلك HDMI
لان كان متين 22 AWG فطلبت لي سلك ثاني من الامازون 1.4 من شركة Iogear بطول 5 متر وسلك بصراحه ممتاز
نقول بسم الله
وماشاء الله تبارك الله
ولاحول ولاقوة الا بالله
.
.
.
.
صار الشكل مناسب اكثر بالذات لان تم تلبيس الجدار الخلفي بنفس ورق الجدارن
.
.
.
.
.
.
.
.
.
الاجهزة اللي موجودة بالرك بالترتيب
Ymaha RX-V3067
Popcorn Hour C-200
PlayStation 3 Slim
Xbox 360 Slim
Xbox 360 Elite
DreamBox 800 HD se
ButtKicker
.
.
.
الراك من الخلف بعد الترتيب
.
.
.
.
.
هذي علبة الكهربا اللي سويتها
وحطيت جمبها مصدر للطاقة لجميع الأجهزة
.
.
.
.
.
انوار LED خلف الشاشة
.
.
هذا الميلان اللي بالفلين ===< محمد ميلان
.
.
.
.
صورة بانورامية
.
اضاءة حمراء
حق محبي اللون الاحمر.
أتمنى ان الموضوع عجبكم وافادكم وقدم شي بسيط لكم لانكم تستاهلون اكثر من ذلك
وإن شاء الله القادم أفضل
واي شي تبونه انا حاضر
وبالتوفيق للجميع
اقتباس
رد: أفكار في إنشاء مسرح منزلي ..
