مراجعتي لتركيب بروجكتور جديد مع الشاشه

[BAROOON]

السلام عليكم ورحمة الله وبركاته ,,,,

في البداية أحب أشكر mks95 بطولة بالة معاي ونصائحة .
وأكيد أشكر العضو المطوع truth81 الي طلبة لي وضبطني .
=======================
البرجكتر حجمة كبير ولا توقعته كذا , ووزنة تقريبا 6 ونص كيلو .
طبعا معروف عند الاغلبية انه يتعلق بسقف , بس المشكلة عندي السقف جبس
ولا ودي اقعد اكسر واخترع ولا تنسون التسليك بيصير فلم هندي .

فقلت اسويلي رف واحط البرجكتر عليه . ومقاسة 52 سم في 52 سم .
وارتفاعه تقريبا 2 متر .
وسمكة 12 ملم , وصبغتة مع الحمالات الي معه بلون اسود .
اعتقد لو رحت ايكيا بحصل رف جاهز افضل من هذا بكثير .
بس مشكلتي احب افصل بمزاجي .
وطلبت كيبل
HDMI 45ft 22AWG

وجبت سلك كهرب 9 متر تقريبا ووصلته علية .
لان كهرب ال220 كله ورا الشاشة ودام عندي مجرى الاسلاك البلاستك فمافية مشكلة .








-----------------------------------------------
نجي الحين للشاشة
رحت محلات اقمشة الستائر وحصلت عندهم بلاك اوت المتر15 ريال .
طولة 140سم .
بكذا عرفت اني مجرب اسوي فريم 135 سم في ,,,,,,
لاني راح احتاج اطراف من القماش عشان التثبيت .
فسويت فريم خشب مكون من اربع قطع مربوعه ,
135 سم في 333 سم << هذا اعرض حجم الي هو 2.41 اعتقد .
وهذي العدة المستخدمة مع الفريم الاول وطريقة التعليق .



















بعد التركيب وتشغيل الافلام صار فية بلاك بارز يمين ويسار
بصورة العادية 1.78
وشغلت افلام 2.35 وصارت بلاك بارز يمين يسار وفوق وتحت .
شغلت Anamorphic Lens
بس ما سوت شي نفسها نفس الwide و الReal
لانها المفروض تعرض الفلم 2.35 ويطلع فل سكرين .
بعد كذا يوم شفت ما منه فايده العرض الكبير رحت وقصيت الخشب وصار مقاس الفريم
135 سم في 241 سم . وهذا مقاس ال16.9 .
وهذي الصور بعد التعديل مع عرض كذا فلم :















































وهذي صور ممكن يوضح السواد

























===============================
بكذا انتهينا في الوقت الحالي .
الي ناوي اسوية مستقبلا
1- بلاك دايموند
2- طريقة عشان ارفع شاشة البرجكتر وهي معلقة مكانها عشان اتفرج على البلازما .
3- اخفاء اسلاك البرجكتر ببلاستك زي السراوند .
--------------------------------
ملاحظة :
ادري يا ميلان فية صور نسوان بس شفتهم متسترين والوانهم حلوة وحطيتهم
فخذ راحتك في الحذف ما عندك مشكلة .

[BAROOON]

للمعلومية ترا الصورة في الواقع افضل من الصور هذي
بنسبة 40% .
هذا وهو قماش عادي جدا + الوان البنكيو غبية لازم اسوي اعدادات افضل من كذا
بس مشكلتة يدوخ وفية شغلات ما اعرف وشي مثل ISF << اعتقد .
في الوقت الحالي اعطية 6.5 من 10 بشكل عام .
----------------------
وكمان فية شغله نسيت اذكرها
القماش جربت كذا لون
اكثر شي ناسبني الي هو سكري او بيج فاتح مرة مدري كيف اوصفة .
الابيض يعطي الوان للبشرة غبية .
=========================


صورة مباراة























------------------------------------------------
افلام

































========================
==========================
===================================

اخر التعديلات :
غيرت الخشب المستخدم في الشاشة وجبت شي اخف , قبل كانت مربوعة 4.50 سم × 4.50 سم
واربع عمدان على شكل مستطيل .
الحين جبت خشب 4.50 سم × 2سم , وست حبات ثنتين في الوسط عشان تكون متماسكة اكثر .
وركبت فصالات باب على الشاشة بحيث تكون ثابتة بمكانها وبس ارفعها بدون ما افكها واعقد نفسي .
وركبت قماش اسود للخشب عشان المنظر .
وهذي الصور :

[alammari]

والله الف مبروك وعقبال البلاك دايموند وتتهنا فيهم يارب

بس ياليت تعطينا شوية تفاصيل عن البروجكتر

[BAROOON]

يبارك فيك يا alammari
تفاصيل :
الصورة الدقة = 7من 10
الحركة 8.5 من 10
الوان 6 من 10 للحين مو عاجبتني

مدري وش تبي تعرف بعد ؟

[mz_milan]

ابداع صراحه ياخالد بسم الله ماشاء الله

الف مبروك عالبروجكتور والشاشه المؤقته الي انت مركبها

بسم الله ماشاء الله انت و truth تحبون الشغل اليدوي وبنفسكم DIY معناها (Do It Yourself) ياخي انا ماعرف الا اشياء بسيطه اسويها بنفسي عشان لا اخرب شي

طيب نجي للجد ذحين القماش ماكانه بعد ماقصيت الخشب وخليته 16/9 صار مو مشدود من الاجناب حاول انك تشده كويس عشان ما ياثر عالصورة

وكمان ياليت تعطينا معلومات عن البوجكتور ورقم الموديل وبكم السعر واصل للبيت

وياليت تقول رايك من غير صور على جودة اداء البروجكتور وايضاً اداء الشاشه والقماش الي انت مركبها كيف ادائها وهل تغنيك ولو لفترة عن شراء شاشه مثل بلاك دايموند او غيرها

عالبركه وتقرير مميز ويعطيك الف عافيه ياغالي

خليتني اغير باروح اكمل موضوعي حق تقييم شاشة سوني

[BAROOON]

هلابك ميلان
ترا الشغله سهلة ولا فيها ذيك الصعوبة الي متخيلها .
1- تجيب الخشب .
2- تركب القماش فوقة .
3- دبس جهة وحده بعدين الجهة الي مقابلتها .
4- شد ودبس كل شوي .

بس اهم شي تحسب التفاصيل كلها حتى الشغلات البسيطة عشان يطلع شغلك مضبوط .

ياخي لو تلاحظ الشاشة الكبيرة القماش فيها مشدود وطالع مية مية .
وهذي الي اصغر مفروض تكون اسهل طلع فيها زاوية مرتخية .
ما أثرت على الصورة يمكن اذا تدقق بس وقلت خلها اجل مالي خلق ارجع اشد من جديد وهي كلها موقته .

benq w6000
مع الشحن من نفس الموقع 7600 ريال تقريبا .

حاليا مع الوضع هذا مبسوط لاخر حد وانا اتفرج على فلم .
بس مع الالعاب ما ناسبني الوضع احس فيه بهتان بلون وقلة بتفاصيل .
ومع المسلسلات الوضع مو تمام .
مع الافلام تعيش جو خطيرر .
وعندي مباراه hd مدري مين ومين بحاول اصورها قريب واحطها لك .
ياخي تصدق انا منزلها عشانك ونسيت اصورها .

الصور توضح الجوده اذا هي كويسة اعرف ان الواقع افضل .
البرجكتر توه يبيله شغل بس لحد الحين اشوفة جيد جدا اهم شي الحركة فيه ممتازة .
الشاشة برضو جيده وتعتبر ممتازة مقابل هذا السعر .
لكن ما اقدر احكم بشكل كامل الا اذا جبت بلاك ديموند او اقلها قماش خاص .

[The Adviser]

ماشاء الله وتبارك الله

ألف مبروووك على البروجكتر وعقبال البلاك دايموند وبتعيش الجو صح

انت وضعك الحين بالألوان مو عاجبك ولا عارف تضبطه أكيد كله من الشاشة المؤقتة وصراحة أهنيك على الشغل ماشاء الله عليك بالك طويل

جيت بسألك عن وضع 2.35 هل كثير من الأفلام بالوضع هذا وانت يوم ماجاء عالمقاس صح بوقت تشغيل الفلم من وين المشكلة بالضبط من مقاس الشاشة والا من شي ثاني ؟؟

[BAROOON]

يبارك فيك وعقبالك تروووووك ,,,

ما اتوقع ان مشكلة الالوان من الشاشة فقط
اليوزر الي حاطينها الشركة الجاهزة مثل سينما و داينمك وغيرة
غبية مرة يعني سويت عليها شوية تعديل طلع فرق كبير
تخيل واحد من اليوزرات كل شي لونة اصفر على فسفوري .
الي لاحظتة انهم حطو اي شي وحطوه بكرتونة .
ايه فية افلام كثير 2.35
شوفها على الxbmc تطلع تحت على اليمين من معلومات الفلم جمب ال720 و ال1080
الشاشة مالها علاقة بعرض البرجكتر .
البرجكتر ما يدري اذا فية شاشة او لا , انت الي تحدد الحجم
والبرجكتر هذا فية ميزة انه يخلي ال16.9 تتحول الى 2.35
لكن اضغط الزر ولا يسوي شي مدري لية !!
قلت يمكن افلام التورنت ما تنفع خلني اشغلي فلم اصلي وبرضو نفس الكلام .
على فكرة جربت افلام 1080 و 720 تورنت ولا شفت فرق بينهم بدقة وبرضو جربت اصلي على السوني3
1080 ولا فية فرق كلهم اشوفهم زي بعض .
الي اشوفة يفرق اذا كان فلم HDTV يطلع فية شكلة مشوش شوي يعني صاير بين الSD و ال HD

[naifaf]

ماشاء الله الصراحة جهاز خرافي الله يعطيك خيرة ويكفيك شرة وعقبال 3D FULL HD

[AVC]

السلام عليكم

مبروك البروجكتر و لو اني عارف انك بتسوي شاشة 2.35:1 كان من الأول قلت لك لا تتعب نفسك لأنها قلق بصراحة و تحتاج اكثر من شغلة غير البروجكتر مثل العدسة الخارجية وجهاز العرض يدعم الميزة هذي وغيرها حتى تصير الشاشة كاملة .
بعدين احتمال ان الترجمة تكون في الخط الأسود و لين الغيته تروح لأن مو كل الأجهزة فيها ميزة تعديل مكان الترجمة وللمعلومية مافيه الا بروجكتر او اثنين في العالم اللي 2.35:1 و لاتسال عن السعر و الرزلوشن حقها مو 1920 في 1080 , الرزلوشن يكون 2538 في 1080 يعني زيادة نص مليون بكسل عن البروجكترات ال FHD .

بالنسبة للشاشة طالما تحب تسوي الشي بنفسك حاول تشوف قماش يكون ثقيل شوي ويكون مشدود مرة حتى الصورة ماتتسرب للخلف و جرب تشغل علية فلم بلوري نسخة اصلية (يعني مو داونلود) وقارن فيه فرق ولا لا لأنه كل ماكبرت الشاشة تتغير الصورة .
ما اشتغلت على ال بينكيو بس اذا فية وضعية ISF عادة تجي ثنتين ذاكرة تشوف بالنهار و ذاكرة تشوف بالليل .

اخر شغلة شف وضعية المية هل هي على العادي او الأقتصادي , العادة الأقتصادي تكون اقل الأنارة بحدود 20-30% لكن عمر اللمبة يكون اكثر 50% و الصوت يكون اهدأ بكثير .

[Pilot b777]

الف مبروك اخوي صراحة إبداع ما شاء الله تبارك الله

[BAROOON]

هلا AVC و يبارك فيك .
بخصوص ال2.35 مافهمتك . الجهاز يدعم بدون عدسة خارجية , هل تقصد لازم عدسة خارجية ولا كيف ؟
فية ISF نهار وليل بس ايش هي ؟ وش تفرق اذا الغرفة مظلمة على طول ؟
اللمبة حاطها اقتصادي عشان زي ماقلت تعيش اكثر وبرضو الصورة تمام .
جربت فلم اصلي على السوني 3 وذكرتها قبل ما شفت فرق .

[AVC]

هلا AVC و يبارك فيك .
بخصوص ال2.35 مافهمتك . الجهاز يدعم بدون عدسة خارجية , هل تقصد لازم عدسة خارجية ولا كيف ؟
فية ISF نهار وليل بس ايش هي ؟ وش تفرق اذا الغرفة مظلمة على طول ؟
اللمبة حاطها اقتصادي عشان زي ماقلت تعيش اكثر وبرضو الصورة تمام .
جربت فلم اصلي على السوني 3 وذكرتها قبل ما شفت فرق .

حتى تحتفظ بالرزلوشن العالي الحل المثالي انك تركب عدسة تحول الصورة الى وضعية 2.35:1 و العدسات مو رخيصة و تركب قدام البروجكتر مثل هذي الصورة :




اذا الغرفة مظلمة خلك على الليل .

* سالفة الصور هذي مو راضية تمشي معي !

دخلت موقع بينكيو لأني ماقد تعاملت مع اجهزتهم وحصلت موضحين ميزة 2.35:1 و مكتوب تحتاج الى عدسة اضافية بس الغريب طريقة التسويق تخلي الواحد يحس انه مايحتاج شي .

هذا الموقع و الشرح تحت

[HAMANY]

ما شاء الله ,, شغلك تمام

AVC
ياليت تعطينا فكرة عن أسعار بروجكترات ال 2.35 والعدسات الخارجية وانواعهم
توني مخلص من السماعات وناوي على شاشة .. فودي اعرف الأسعار و الألغام الي بتواجهني

افكر في شيء قريب من ذي
http://img21.imageshack.us/img21/7786/1810k.jpg

وذا عندك فكرة عن هالبروجكتر والعدسة لا تبخل علينا
http://img860.imageshack.us/img860/2...im2c3x1080.jpg

[BAROOON]

avc
قريت في الرابط الي عطيتني .
Movies in Full Screen

Panamorph™ lenses allow you to show 2.35:1 aspect format video – such as major studio movies - in their original widescreen format at maximum resolution with no image distortion or letterboxing.
هنا ما فهمت هل يقصد العدسة موجودة بلت ان ولا لازم اجيب خارجية برضو مو واضح .
انا الي اعرفة ان العدسة هذي تركبها على اي برجكتر وهي تعطيك 2.35 مدري اذا معلوماتي غلط اتمنى تنورني .
اذكر اني شفت البناسونك
PT_AE4000
مقطع على اليوتيوب وهو يحول الصورة عن طريق الذاكرة .

----------------------
بنسبة للISF ايش يفرق وضع الليل عن النهار ؟

[Talal ALateeq]

مبروك الافراج ياخالد : )
هات صوره من بعيد وقت التشغيل ليه مقرب كل الصور
بعدين الرف شف لك حل او خذ لك تعليقه بالسقف ابرك لك بس بتواجه مشكلة الاسلاك

[BAROOON]

هلا طلال ,,,,
الصور متعمد اخليه كذا عشان تبان عيوب الصورة وتبان الدقة اكثر .
لان كل ما تبعد عن الشاشة تطلع الصورة افضل .
بس ولا يهمك اليوم بحاول امحط كذا صورة من اكثر من زاوية وكمان صور المباراة .

الرف وشفية ما فهمتك هل شكله مو عاجبك عشان الاسلاك يعني ؟

ترا الكلام اسهل من التطبيق التعليق يبيله فتحة بلجبس وبعدين تحفر الدريل .
وبعدين الاسلاك تمدها برضو من فوق وتسوي فتحة ثانية يعني فلم هندي يا الحبيب .
كذا اسهل , والاسلاك بركب بلاستيك واصبغة نفس البوية وخلاص .

[Talal ALateeq]

دور لك رف كبس زي الي بايكيا بحيث مايظهر الحامل حقه
بس ما ادري ابعاد الرف هل بتناسب حجم الجهاز او لا

[AVC]

avc
قريت في الرابط الي عطيتني .
Movies in Full Screen

Panamorph™ lenses allow you to show 2.35:1 aspect format video – such as major studio movies - in their original widescreen format at maximum resolution with no image distortion or letterboxing.
هنا ما فهمت هل يقصد العدسة موجودة بلت ان ولا لازم اجيب خارجية برضو مو واضح .
انا الي اعرفة ان العدسة هذي تركبها على اي برجكتر وهي تعطيك 2.35 مدري اذا معلوماتي غلط اتمنى تنورني .
اذكر اني شفت البناسونك
PT_AE4000
مقطع على اليوتيوب وهو يحول الصورة عن طريق الذاكرة .

----------------------
بنسبة للISF ايش يفرق وضع الليل عن النهار ؟

الميزة ماهي ضمن البروجكتر وتحتاج عدسة خارجية و Panamorph هذي شركة متخصصة في العدسات و هذا موقعهم وتقدر تركبها تقريبا على اي بروجكتر و لو تلاحظ في موقع الشركة تحت اغلب شركات البروجكترات مذكورة .

الطريقة اللي يسويها الباناسونيك عبر الذاكرة وماهي نفس هذي و اظن هو الوحيد اللي فيه هذي الميزة .

مثل ماذكرت من اول هو خيار مكلف سواء من سعر العدسة الأضافية او الشاشة او غيرها .

بالنسبة للفرق بين الوضع للنهار و الليل هو وزنية مسوينها و ضاربين حساب الأنارة في النهار في وضع الصورة وطبعا تخضع للذوق الشخصي و انت جرب كل الوضعيات وشف وش يناسبك وترا القماش له دور على الصورة .

[AVC]

AVC
ياليت تعطينا فكرة عن أسعار بروجكترات ال 2.35 والعدسات الخارجية وانواعهم
توني مخلص من السماعات وناوي على شاشة .. فودي اعرف الأسعار و الألغام الي بتواجهني


وذا عندك فكرة عن هالبروجكتر والعدسة لا تبخل علينا

بروجكترات اللي تكون 2.35:1 تبدأ من فوق ال 100 الف ريال والبروجكتر اللي حاط صورته هذا من شركة سيم تو أليطالية و سعرة 45 الف دولار بدون العدسة , العدسة اللي حاط تعتبر افضل شي لأنها كهربائية و سعرها اذا ماني غلطان في حدود ال 6000 دولار .

النظام اللي في الصورة مع السماعات و باقي الأجهزة سعرة لا يقل 150 الف دولار لأن هذي الشركات تعتبر النخبة في عالم الصوت والصورة و اللي يسمونها High End .

بعد المقدمة بسالك ليش تفكر في نظام 2.35:1 ؟ هل شفتها على الطبيعة ؟

اذا تبي بروجكتر مع شاشة بجودة و سعر مناسب فتحتاج تحدد خياراتك و تتاكد من حجم الغرفة و تشوف وش الخيار اللي يناسب حتى تبدأ رحلة البحث بطريقة صحيحة وتقبل تحياتي .