السلام عليكم ورحمة الله وبركاته
الموضوع راح يكون عن كيفية انشاء رفوف للمسرح المنزلي Home Theater Rack تقدر تبحث في قوقول وراح تشوف عينات كثيرة
الفكره :
من زمان وانا اتمنى ان اخذ لي رفوف للمسرح اللي عندي...وبعد فترة وبالصدفة شفت هذا الرف ودخل مزاجي وبقوة
لكن هذا كان بعد فوات الاوان...وماعد ينفعني لان شريت طاولة والمشكلة الكبيرة ان التمديدات اللي سويتها وعلب HDMI واشياء كثيرة كانت خلف الطاولة... فاذا شريت هذاالرف راح اتورط...فمالي أي حل
المهم بعد سنتين ونص ادخلت افكارجديدة في راسي اني اغير ترتيب المسرح عندي وسويت تصاميم كثيرة للمسرح
وقلت لا بد من هذا الرف اني اخذه ... رغم ان التغيير راح يكون بعد شهور ... لكن مافي مانع اني اخذ الاشياء البسيطه اللي احتاجها ... ورحت للمحل والصورة معاي وحاط في باللي انه مر سنتين واني ماراح القي الرف موجود لكن كنت متفائل
رحت ومالقيته طبعاً وقالوا لي ان بعد شهرين احتمال توصل دفعه منه...صادني احباط بس قلت في نفسي لعلها خير
وقلت بطلب من برى ودورت في النت وكانت اسعارها خيالية وشحن يكلفوالاشكال اللي لقيتها مكانت داخله مزاجي
واخيراً فكرة اني اصمم شي على مزاجي واتفنن فيه
طولت عليكم كثير بالقصة والحين اترككم للموضوع
المواد المستخدمه وعملية الإنشاء :
الرفوف Rack يتكون من خشب نوعية اوك ...وزجاج لون ثلجي
والمشورع كان كالتالي :-
اول شي شويته اخذت مقاسات الاجهزة اللي عندي ... وبعدين تم رسم التصاميم ... واخترت افضلهم بنظري ورحت وشريت الخشب
عبارة عن 6 عواميد كلها بطول 110 سم
2 مقاس 2 في 4 انش
2 مقاس 1 في 4 انش
4 مقاس نص في 4 انش
وبعدها بدا البحث عن النجار ثم لقيت صعوبه علشان اشرح الطريقة اللي فيبالي
وبعد الانتهاء من الشغل
طلعنا بهذي النتيجة
.
.
.
.
.
.
.
هذي صورة امامية (شكلة عادي جدا)
الصندوق اللي بالاسفل اخذة فكرته من الاخ دولي
هذي صورة تبين نوع الخشب ولونه
صورة جانبية
صورة خلفية
صورة خلفية لكن من الاسفل
وخليته الطرف السفلي اللي بالخلف مفتوح ( بعدين بتعرفون ليش )
صورة من اسفل
وهذي صورة ثانية بعد ماركبت الكفرات
وهذي بعد ماركبت عليها الكفرات
وهذ بعد تركيب الكفرات صار مرتفع اكثر وصار اسهل للتحريك
بس ماكملت فرحتي رجعته للنجار لانه كان في اخطاء في المقاسات
وعاد الشغل كله من جديد
يمكن حتى الحين الكل يشوف ان مافي أي شي مميز
المهم بداء الشغل الخاص فيني
العمودين اللي بالخلف هم عبارة عن مجرى للاسلاك وميزتها انه يخفيهم (تابع الموضوع وراح تعرف كيف)
العمود اللي على اليمين مخصص فقط للكهربا و العمود اليسار مخصص لباقي الاشياء
من الداخل مثل ماتشوفون ان في فتحات بالاسفل علشان ادخل الاسلك اللي ابيه من تحت
فتحتين تكفي...لكن سويت اكثرعلشان التهوية حق محولات الكهرباء وسويتش حق الشبكة
اثناء هذا الشغل كنت ماخذ المقاسات مره ثانيه بالملي للخشب علشان افصل الرفوف الزجاج
وكانت في مشكلة صغيرة...كنت ابي شي اثبت فيها الزجاج على الخشب ولقيت اشياء كثيرة لكن الزجاج اللي انا فصلته سمكة 8 ملي ووزنه ثقيل وبحط فوقه اشياء يعني يبيله شي قوي يتحمل
وبالصدفة لقيت عند محل هذاي القطعة
طبعاً ثالث واحد من اليسار هو اللي يناسبني
للاسف كان عينة وغير متوفر منه...ودورت كثير وسالت ولقيته عند محل ديكورات بعد 3 ايام من البحث
وكنت مفكر ان هذي القطعه مفتوحه من الجهتين بحيث اني ادخل البريقي من جه ويطلع من الجهة الثانية ويتثبت بالخشب لكن كان مفتوح من جه وحده
وكان الحل بسيط جداً
ثبت القطعة بالزرادية ثم خرمته بالدريل
وبعد تركيب قطع التثبيت تم تركيب الرفوف
هذي صورة جانبيه حتى تعرفون شكل الزجاج كيف
وبعده حطيت علامة استدل عليها على مكان كل رف وفكيتهم كلهم من جديد
علشان اسوي خروم الخاصه بالاسلاك
وكان بهذا الشكل ...العامود اللي على اليسار في بعض الفتح مربع الهدف منها تركيب موصل للكهرباء
وركبت حق الكهربا بس باقي ماثبته
وركبت بعده الرفوف وشبكت الاسلاك في حق الكهرباء
حطيت معجون خشب في الفتحات الكهرباء لانها كانت وسيعه شوي وغير متماسك
لكن الحين ولله الحمد قوي ولا يتحرك من مكانه
الاسلاك سويتها للامبليفاير والبوب كورن و السلك الصغير للبلايشتيشن وللاسف ماقدرت اسوي للاكس بوكس بحكم محول الكهرباء حقه
سلك صغير ومرتب
.
.
.
.
طيب انا قلت لك في البداية ان الاسلاك راح تكون مخفية ... فكرت فيها وطلعت لي حلول كثيره .. لين الله هداني ولقيت الحل المناسب لإخفاء الاسلاك
شريت قطعتين الخشب هذي مع صبغ بخاخ لون ابيض حق الخشب وصبغتهم
وبعدين ركبت لها فواصل حق البيبان وركبته بالخلف
وبالطريقة هذي مافي أي سلك راح يبين
واسلاك السماعات والكهرباء كلها راح تدخل من الاسفل
النتيجه و الشكل النهائي للمشروع :
لاتنسون ياشباب تذكرون الله وتقولون ((ماشاء الله تبارك الله))
وبكذا انتهينا من هذا المشروع بفضل الله
لكن ماراح استخدمه حالياً حتى انتهي من باقي الاشياء اللي مخطط عليها
انتظروني في الجزء الثاني من التقرير
واتمنى ان الموضوع نال اعجابكم
والسلام عليكم ورحمة الله وبركاته
اقتباس
