السلام عليكم ..
حيا الله كلن باسمه ..
منذو زمن غابر ومبطي كتبت موضوع عن غرفتي القضية التي لايمكن حلها ..
هالكلام له مايقارب السنة أو أقل ..
http://www.avarab.com/vb/showthread.php?t=2217
أخس نقطة عندي اني عججججججججججاز ومن الطراز الرفيع مع مرتبة الشرف ..
طبعاً الشغل والفن والهندسة والتكتكة ماتمشي مع هالخصلة السيئة والغبية ..
المهم لي شهر وأنا احس بالملل من هالحال ..
جالس في غرفة اسمنت × اسمنت ..
مافيها نقطة بوية أو شي يفتح النفس ..
وصاير المكان أسوأ من عزبة عامل من حيث الترتيب والغبار المتراكم
فجأة ..
فجأة ..
فجأة ..
بديت أشتغل ..
بس كيف ..؟
بديت بالعكس أو بالريوس ..
المهم كنت أفكر وأفكر أفكر كيف اصمم الغرفة بشكل جميل مع اني من جمبها بهالامور ..
بالأخير اقتنعت اني اسوي لي باترن أو نمط معين مايكون متعب بالتركيب والتنسيق مع تحديد اللون الاساسي والالوان الثانوية ..
فالنمط عندي واللي راح أكسر فيه جمود الغرفة هو الزيبرا ..
والالوان هي الابيض السكري + الاسود + الاحمر + الرمادي الفاتح أو الفضي ..
كنت شايف في مطعم عندنا دورة مياة أعجبني فيها ديكور السيراميك على شكل زيبرا روعة ..
دورت هالسيراميك وماحصلته وجيت للرياض ولقيت شيء جميل لكن مش هو المطلوب لكن اقتنعت فيه واعجبني خصوصاً ان شكله زجاجي يعني كأنك تشوف قزاز مش سيراميك ..
شريت منه 16 حبة طبعاً مقاسها 30×30 واخذت معه سكري جميل مقاسه 60×60 ..
رحت للمفروشات ودورت دورت دورت ولقيت قطعة الموكيت 2 × 3 هاذي بـ 700 ريال وأخذتها :
كل هذا من باب الدعم المعنوي وعشان ماأتراجع وأكسل ..
كنت راسم ببالي التوزيع التالي :
طبعاً المسرح اللي عندي هو 7.1 ..
ووزعته بالشكل اللي تشوفون علماً بأن الاكس الازرق هو السنتر والاحمر هو السب ووفر ..
وشاشة الـ TV مكانها راح يكون مكان الاكس الازرق وفوقها طبعاً شاشة البروجكتر اللي لازم تكون ممررة للصوت ..
المهم جبت الكهربائي وقلت أبيك تكسر لي مسارين بحكم ان الغرفة خالصة من التلييص وماكنت حاسب حساب اللي أحتاجه ..
طبعاً المسارين واحد بارتفاع 90 سم وواحد بارتفاع 1.60 م ..
الاول بيكون مسار أسلاك انترنت + usb + HD + دش ..
الثاني بيكون مسار لاسلاك السماعات فقط ..
وطلبت تكسير مسارات للمبات جدارية ومسار لاسلاك البروجكتر وتعديل نقاط الكهرباء الموجودة إلى نقاط مزدوجة 220+110 وتعديل مستوى ارتفاعها ..
وسويت غرف تفتيش أو صيانة فيما لو احتجت امدد سلك جديد أو ابدل سلك فراح أواجه صعوبة في تمديده اذا ماكانت هالغرف موجودة ..
الاصل انه في كل جدار غرفة صيانة وحدة لكن :
خلصنا تكسير وسوينا مسارين بمواصير كهرباء حجم 2 بوصة ومسار اسلاك البروجكتر وجبت المليص وقلت ليص لي الغرفة ورجعها زي ماكانت ..
وهوووبا خلصنا كل شيء ..
فتحت موقع مونوبرايس المشهور والنكبة بنفس الوقت ..
الموقع هذا فيه سلبية عنيفة جداً جداً وهي اذا جمعت اغراضك بالسلة ورحت اسبوع ورجعت السلة تلقاها فاضية ..
صارت لي معه مواقف قبل كم شهر اجممممع اغراض كثيرة بدون مااسجلها لانها واجد بصراحة وبعد يومين القاها طارت ..
بعدين ارجع على نفس السيرة اجمعها من جديد واخر حل سويته يوم خلصت مجمع اغراضي سويت برنت سكرين للشاشة ..
طبعاً ليه ماأدفع على طول وخلاص ..؟ أنا من النوع المتريث بمثل الاشياء اللي زي كذا لازم أبحث وأقرا وأقارن و و و و ..
المهم فتحت عليه قبل أسبوع ونص وكتبت نفس الطلبية اللي سويتها قبل وأضفت كم غرض وبعدين سويت تشيك آوت يوم الاثنين وسافرت وبدت بعدها المعاناة ..
ارسلوا لي وأنا في دبي يبغون صورة ID بسبب اني طالب شحن دولي مباشر لاني سويت حسبة مختصرة لقيت المباشر والسريع أوفر من مشاوير الصناديق الامريكية ..
يالله دور فاكس في دبي وارسل ياااااااالله وانحلت المسألة في يومين المهم ارسلوا لي مرة ثانية قالوا مادفعت لنا قلت سويت لكم اوثورايز بالسحب ورجعوا سحبوا ..
ارسلوا للمرة الثالثة قالوا انت كاتب في عنوانك منطقة alqassim واحنا مانعرف الا منطقة
Al Qasim قلت لهم والله العظيم هي نفسها قالوا اوكي نعدل معلوماتك عندنا والحمدلله انتهت بسلام وارسلوا لي بعدها بكم يوم قالوا ترا عطيناك العضوية الذهبية بالموقع ..
المهم أغراضي تكلفتها 2322 ريال سووا لي خصم عليها طلعت 2088 ريال وقيمة الشحن المباشر السريع وليس العادي 810 ريال صار المجموع 2900 إلا كم ريال وشحنوها الأربعاء من عندهم ويوم الأحد استلمتها ..
طلبت أفياش + أسلاك سماعات + قسامات + اسلاك HD + اسلاك usb + البنانا بلقز
وزن الشحنة كاملة 37 باوند ..
جبنا الكهربائي مرة عاشرة وقلنا تعال مدد الكيابل وضبط الوضع من والى :
وبس ..
وهنا وقفنا ..
طعباً التكسير كلف 1500 ريال + اعادة تلييص 400 ريال ..
رحت امس لمهندس الديكور اللي بينصب علي وبياخذ فلوسي قال انا مسافر واجي يوم السبت ..
المهم اني قلت ابسوي عملية تفتيش لورق الحائط وبالصدفة وقعت على :
ورقط حائط ايطالي لونه رمادي فاتح او فضي ..
اعجبني رسمه ومقارب جداً لديكور السيراميك ..
المهم كل اللي راح مااعتبره شغل ..
الشغل باللي جاي ..
التنسيق وترتيب السيراميك والوان الديكور وشكله و و و هذي اللي أنا بجيب فيها العيييييييد ..
باقي لي اشتري :
الديمر من لورتن وبسوي زيارة لوكيله بالرياض ..
حوامل سماعات
لمبات جدارية
اغطية غرف الصيانة
سبوت لايت led قابلة للتحكم بالديمر
كرسي ليزي بوي
جلسة محترمة ومريحة
راك او ارفف للاجهزة
مكيف سبيلت
اممممممم تقريباً هذا اللي باقي ..
خلوكم قريبين ..
اليوم بيجي مهندس الديكور يشيك ع الملحق اذا يبي تعديل والا يباشر عمله ..