أشيروا علي يا قوم # أشتري سماعة هيدفون ~[ Sony ] ولا [ Sennheiser ] يوجد صور وموديلات

[Mojebd]

السلام عليكم ، مثل ما انتم شايفين بالعنوان


لي أسبوع مغير بهالمواقع الأجنبية أدور سماعات زينه


اللي صفا لي نوعين :


الأولى Sennheiser HD 428 وعليها عرض ممتاز بـ 33 دولار





والثانية Sony V55 وسعرها غالية شوي تطلع لي 55 دولار





صراحة أكثر المواقع يمدحون السوني بشكل رهيب حتى واحد أمريكي سووا مقارنه السوني مع البيتس سولو اتش دي ونجحت السوني بالمقارنة


واللهي محتار جدا جدا جدا ، أشيروا علي أيها القوم ،،، لو تجيبون موديلات ثانيه مو مشكلة بس أحسبوا حساب أن حدي من 50 دولار ونازل :new7:


أنتظركم بفارغ الصبر

[Elgrande]

شنو أستعمالاتك لها ؟

و شنو السورس "مصدر الصوت الي ناوي تشبكه عليه" ؟

[Mojebd]

هلا اخوي

استعمالاتي : شوية افلام - واكثر شي ميوزيك - شيلات - ابي نقاوة صوت ماقد حسيت فيها بالسماعات العادية .

لقيت ايضاً هالسماعة من شركة اوديو يمدحونها المنتديات الامريكية وشرايكم فيها

موديلها Audio-Technica ATH-M40FS

[Mojebd]

نسيت اقول المصدر اللي راح اشبكها فيه :
ايبود كلاسيك - ماك بوك لابتوب - جوال HTC - ايفون .

بس

[Elgrande]

هلا مرحبا في الميزانية الي ذكرتها صعب جدا انك تتوقع شيء بيبهرك

و شي ثاني البيتس من أسوء السماعات بالنسبة لي لا تغرك بسعرها و الدعايات الي مسوينها

المهم الخيارات الي ذكرتها جيدة لكن لو بتزيد الميزانية شوي بتحصل خيارات أكثر و فرق أكبر

الأوديو تكنكا الموديل الأعلى منها الي هو m50 أفضل بكثير بس تحتاج أمبليفاير عشان تعطيك أفضل أداء لها

أنصحك حق أستخدامك Sennheiser HD 449 ( أكثر من ميزانيتك بس متأكد انها بتريحك و بترضيك )

أو السوني Sony MDR-V6 سعرها فلته في أمزون ماتتفوت أفضل بكثير من السوني الي ذكرتها

تحياتي

[Mojebd]

الله يسعدك يا غالي ويطولي بعمرك ، ردك وسع صدري

المزانية عادي ازيدها إلى 68 دولار نفس قيمة sony v6 مع الشحن تطلع لي حوالي ٢٥٠ ريال ،،، والله شكلها عجبني

انت وشرايك يا غالي هذي هي اللي السوني V6



انت ذكرت ان الاوديو تكنكا لازم امبلفير وشغله ،،،، انا يخوك ماني بهالامور ، ابي صوت نقي ويعزل الصوت الخارجي وتكد معي واطلع بها النادي والممشى والسفريات يعني بكرفها ولاهي بجالسة بالبيت مريحة

انت وشرايك يا غالي وباخذ بكلامك اتوكل على الله واخذ السوني V6 ؟؟؟ حسب أستخداماتي اللي ذكرتها قبل .

انا بحثت عليها بقوقل شفت عليها دعم خيالي ،،، واحد حاط تجربته انقطع السلك حقه ثمن غيره ،،، والجلدة حقت الاذن غيرها ،،، يعني لها قطع غيار ،،، وهذا اللي معجبني فيها

وش قلت الله يسعدك ؟؟؟؟

[ابو ابراهيم]

اخوي السماعات اللي ذكرتها حجمها كبير واذا كنت ناوي تستخدمها للتنقل او اثناء المشي بتتعبك

واذا كنت بتستخدمها في البيت انصحك تاخذ لك شي لك وللزمن بس لازم تدفع مبلغ وقدره اذا بغيت شي يبهرك

ثاني شي انتبه للكوب هل هو جلد ولا مخمل والسماعه كلوز ولا اوبن ,

الاوبن (المفتوحه) تكون عادة مخمل واريح من الجلد وضغطها اخف على الرأس ولكن عزلها ضعيف والكلوز العكس تكون عازلة وتكون جلد عادة ...

والاوم كم خصوصا انك ماتبي امبليفير

السوني 63 اوم والسينهيسر 32 اوم

وانا ارشح لك السينهيسر نفس اللي رشحها لك اخونا Elgrande

واي استفسار تحت امرك ولاتستعجل

[Mojebd]

هلابك يابو ابراهيم ، كنت على بعد 5 ثواني من الضغط على زر الشراء لسماعة سوني V6

وشفت ردك قبل قليل ، وقلب الموازين

الحين يا طويل العمر السنهيزر اللي ذكرتوها يا اخوتي الكرام غالية + وتقييمها ضعيف في أمازون

أنا أستخدامي يا جماعة الخير ماهو بروفشنال ، أبي سماعة على قولتك لي وللزمن وبنفس الوقت صفاوة ونقاوة صوت

بالنسبة للأوم ،، كل ما قل كل ما ضبط الصوت ؟! ولا العكس ، لأني لن أستخدمها إلا على أيفون ، أو مشغل mp3 أو على لابتوب لا يوجد به كرت صوت أحترافي

الكوب من كثر ما قريت ضيعت وش أزين الجلد ولا المخمل ،،، أنا أبي اللي تريح الأذن + ومثل ما أنت عارف بآخذها للنادي = يعني فيه سوائل [ عرق ] فا أخاف تخرب المخمل بسبب ذلك

وآخيراً كلوز ، أو أبن ، = أذني ما تتحمل الكتمه ، راح تحتر الأذن ويمكن يكون هناك مضاعفات ، وكل هذا عشان ما يسمع اللي جنبي الصوت ، العكس هذة النقطه لا تهمني أطلاقاً ، أشوف أن الأوبن أفضل وأصح صحياً .

اللي بقولة لك بيض الله وجهك على ردك ، وأبي أعطيك كم موديل + بصورهن = مختارهن أنا بعناية وتغطي الميزانية ، فياليت تشوف لي الأحسن بارك الله فيك ورزقك من غير لا تحتسب ، على مساعدك لي ووقفتك الكريمة

أولا : sony v6 السعر 68 دولار

ثانيا : Audio-Technica ATH-M40FS السعر 49 دولار <<< يعيبها ان رأس السلك حقها كبير ماهو 3.5 اللي يركب بالجوالات

ثالثاً : Sennheiser HD 429 السعر 55 دولار >>> كان عليها عرض ب 29 دولار لكن ما الله قسم .

رابعاً : Sennheiser HD 419 السعر 38 دولار <<< عليها عرض الحين ب 29 دولار

أختبار أفضلهم ولا تهون ، واذا عندك موديل كويس سعرة تحت 70 دولار وتنصح فيه ، والله يبارك فيك ويطول بعمرك

أأأأأأأأأأأأنتظرك ،،،

الصور

السوني v6


الاوديو تكنكا 40 اس




السنهيزر 429





السنهيزر 419

[ابو ابراهيم]

اذا بغيت التقييم الصحيح للسماعات لاتاخذه من أمازون شوف الموقع هذا متخصص

وهذا رابط تلقى فيه تقييم الهيدفونات والاجهزة المخصصة للصوتيات المتعلقة بالهيدفون

http://www.head-fi.org/products/

ثاني شي ليش تستعجل انا قبل اشتري سماعتي جلست تقريبا شهر كل يوم اقرأ وابحث واستفدت من هالفتره اني اخذت سماعة تلبي طلبي واستفدت كثيرا واخذت خبرة في عالم الهيدفون

بالنسبة للأوم اذا قل مو معناته ان جودة الصوت تقل لا ,, معناته انها ماتحتاج داك او امبليفير عشان تعطيك كل قدرتها

وجودة الصوت دائما تعتمد على التصنيع من الشركة ومثلا عندك هذي السماعة من دينون 25 اوم وسعرها فوق 400 دولار واحترافيه ومن أفضل السماعات ولاتحتاج امبليفير

http://www.amazon.com/Denon-AHD2000-...rds=denon+2000

انا في نظري أهم شي في السماعاة 3 نقاط

1: الراحة 2: جودة الصوت 3: الشركة المصنعة وجودة التصنيع

لان لو اخذت سماعة محترمه ومن شركة محترمه ولكن ماارتحت لها وانت لابسها أكيد بترميها

وبالنسبة للخيارات اللي وضعتها السوني استبعدها لانها 63 اوم ومااتوقع بتعطيك قدرتها بدون داك او امبليفير

والتكنيكا ماشفت نفس هالموديل لكن اتوقع نفس السوني تحتاج امبليفير

نصيحة اذا تبي شركه حلوه وراحة خلك على السنهيزر وموديل 429 اشوفه مناسب وممكن تاخذ 419 لو ماتبي جلد ولكن اتوقع الكوب مو مخمل زي الموديلات العليا انا اشوفه ( اسفنج )

انا استغرب من يشتري مثلا نظارة شمسيه بفوق الف ريال ويستخسر يدفع نفس المبلغ في سماعة مع ان السمع حساس جدا

اذا تبي نصيحتي ارفع المبلغ وخذ لك شي لك وللزمن ويريحك واي استفسار بانتظارك ,,

[ابو ابراهيم]

انا ارشح لك هالسماعه

http://www.amazon.com/Sennheiser-HD-...sennheiser+439

ماتحتاج امبليفير ومن ضمن مواصفاتها انها مخصصة للايباد والايبود وتعمل معهم بكفائة وتفرق عن حدك تقريبا 35دولار

[Mojebd]

أبو ابراهيم ، ما أقول إلا الله يجعلك من أهل الجنة اللي تجري من تحتها الأنهار

أنت فتحت عيوني على أشياء ما كنت أعرفها ، ورحم الله والديك وإطال الله بعمرك

بعد البحث والتمعن حول الميزانيه ، أخذت بكلامك ، والميزانية الحين رفعتها إلى 120 دولار

لقيت السماعة اللي أنت نصحتني فيها Sennheiser HD 439 عليها عرض ب ٧٩ دولار <<< اللي عجبني فيها سلكها أقدر افكة وإركب سلك غيره نفس طريقة Aux

ولكن دام الميزانية تغطي أكثر ، وبعد ما تغمقت بالموقع اللي عطيتني أياه ، ومقارنات باليوتيوب ، المنتديات الامريكية تنصح بهالموديل وتقييمه عالي جداً في الموقع + وفي أمازون

اللي هو audio technica ath-m50

المبلغ راح يكون حول الخمسمية رياآل ، فلذلك أبي شيء لي جامد ، لأن عندي مسرح ياماها وسماعات مزعجة ، فإذا جاء الليل ، ما قدرت أشغله ، لأني ازعج الشيبان

،،، أبيك تحط بعين الأعتبار ، اللي هو الدعم ، لو مثلن أنقطع السلك أقدر أغيره ؟؟ ،،، لو بغيت أغير قطعة الكوب جلد كانت أم مخمل ، أقدر أغيره ، لأني بكدها إلين تعض الأرض وأحلل شقا عمرى على قولهم ههههه

،،،، تعبتك معي والله ، وأبي منك أخر رد بس ، يا تنصحني بموديلات أحلا بما أن الميزانية أرتفعت أأأأأأو

أتوكل على الله وأشتري Sennheiser HD 439 دام أستخدامي ما يستحق سماعات أحترافية ،، .

والللللللللله يبيض وجه راعي المنتدى اللي جمعني فيكم يا الوجية الغانمة .

،،، بالانتظار

[ابو ابراهيم]

شوف كان الجلد مناسب لك خذ اوديو تكنكا

وكان ماتبي جلد خذ السنهيزر

واذا قررت شوف لك وقت فاضي وشوف المراجعات للسماعة وانطباع الناس عنها في اليوتيوب وهل تعمل على الاجهزة المختلفة بكفائة ام لا

السينهيزر مذكور بمواصفاتها انها تعمل على عدة اجهزة

وانا ارشحها لك خصوصا ان الشركة معروف عن سماعاتها انها مريحة

واذا اقتنعت فيها توكل على الله واطلبها مع اني ماودي اتخذ لك القرار لاني ماقد جربت السماعة ولكن اشوفها هي المناسبة لك من ناحية السعر واستخداماتك لها

وبالنسبة للكوب هل تقدر تغيره أم لا ماعندي خلفية بصراحة وهذي ممكن تحصلها بمواصفات السماعة من نفس موقع الشركة او مراجعات اليوتيوب

وبالتوفيق ,,,

[الأزرق]

أخي الكريم

لدي ابني سماعة سنهايزر اعتقد موديلها 202 تعد من السماعات الابتدائية ؛ ولكنها روعه بحسب رواية الابن اصلحه الله خاصة مع الأفلام.

قاعدة : التقنية الألمانية توقف عندها بعض الوقت ، وكما قال الأخوة الفضلاء لا تبهرك ضخامة الدعاية ( السوني مثلاً رائعة بالشاشات ، والبلايستيشن ... ) أما تقنية الصوت فعليك بالشركات العريقة في ذلك وخاصة الأوروبية والألمانية بدائرة أضيق.

والله أعلم