بسم الله الرحمن الرحيم
في البداية انا مالي اي علاقة بالمشاركة في اي منتدى ولكن هذا المنتدى بالذات اجبرني على المشاركة فيه
ومن باب رد الجميل حبيت اشاركم بتجربتي الأولى في اقتناء سينما منزلية .
وبالمناسبة انا اسكن حاليا في اوروبا بدولة بولندا العزيزة وبالتحديد العاصمة وارسو ( بغرض الدراسة لتحضير رسالتي الماجستير والدكتوراه ) <<< ادري مالها داعي بالموضوع بس ما ادري شلون ابدأ
الفكرة جاتني قبل شهرين وقبل ما انتقل الى شقتي الحالية وكنت في طور البحث عن شقة وفي وحده من الشقق وانا جالس اشوفها مع زوجتي اعجبنا تصميم الشقة واثاثها بس لفت نظري ان مافيها تلفزيون ...
كان امسك هذاك البولندي واقوله يالحبيب بتخليني اسكن في شقة بدون تلفزيون ؟؟؟؟
وبكل برود مسك ريموت وكبس الزر وكان تنزل ستاره بيضا على الجدار المقابل وبكبسة زر ثانية طفت الانوار . وشوي الا يشتغل البروجيكتور بريموت كنترول ماسكه بيده
انا هنااااا ويني ما تلقاني ؟؟ هههههه لان الشقة كان تصميمها روعة والعيب اللي كنت اشوفه فيها هو ان مافيها تلفزيون بس وراني شي احلى من اكبر تلفزيون
المهم انا الا ابي استأجر الشقة هذي بس الاخ البولندي قال ما راح اترك الشقة الا بعد اسبوعين ... وانا بصراحة ماكنت اقدر انتظر .. ورحت مجبور ابحث عن شقة ثانية لكن فكرة البروجيكتور مو رايحة عن بالي .
استأجرت شقة في احدى الضواحي الجميلةوبديت ارتبها وانا في بالي ان هالشقة ما راح تكتمل الا بالعروسة الجديدة ( البروجكتور طبعا )
المهم بديت البحث عن طريق موقع ebay وحصلت لي بروجكتور بسعر 200 ريال تقريبا وشاشة ب 100 ريال وشحن 70 ريال .. (400 ريال مجموع) قلت والله يا بلاش اثاري البروجكتور ماهو غالي وكشخة برخيص .
ومع البحث في الانترنت بالصدفة دخلت على هذا الموقع اللي بصراحة نورني بشكل مو طبيعي وجلست اقرأ فيه بلا هواده واستفيد من كل موضوع تطيح عليه عيني . بس والله يا أخوان انصدمت .. من بعد ماني حاط ميزانية 500 ريال حق احلى بروجيكتور صارت السالفة عشرات اضعاف هالمبلغ ... بس كلو يهون عشان عيون السينما.
وبدأت رحلة البحث من جديد وجلست ابحث عن محلات في منطقتي والحمدلله كثيره وتخليك تحتار ايش تختار
الى ان توصلت لمحل كويس وحسيته ينصح وفهمني على شغلات كويسة
http://www.rzutniki.com
هذا رابط لموقع المتجر لو حاب احد يطلع
المهندس اللي بالمحل جا لي الشقة واخذ المقاسات و اختار لي الابعاد المناسبة للشاشة ونوعيتها وحصر اختياراتي بين 4 بروجكتورات
2 منها ما كانت Full Hd وبالبداية ما كان يهمني هالموضوع بس دخلت صالة العرض عندهم وشغل لي البروجكتورات عشان اقارن , بس لما شغل لي Full HD بصراحة كان الفرق شااااسع جدا ولا مقارنة .
فقررت اني اخذ بروجيكتور Optoma HD25e وهذا طبعا بعد ما قرأت تقارير عنه في هذا المنتدى اللي خلاني اعقد العزم واخليه الخيار الاول والصحيح بالنسبة لي .
حاليا انتهيت من شراء البروجيكتور والشاشة وباقي لي نظام الصوت ( واللي حاب اني اخذ مشورتكم فيه )
بس الحين خلونا نشوف العده اللي شريتها
السموحة منكم على ضعف جودة الصورة لاني ملتقطها بجوالي , بس وعد مني التقرير النهائي راح يكون بصور احترافية .
[IMG][/IMG]
[IMG][/IMG]
هنا تبان ماركة الشاشة من شركة KAUBER اللي تعتبر رائدة ومتميزة في صنع شاشات البروجكيتور في اوروبا
[IMG][/IMG]
[IMG][/IMG]
وهذا البروجكيتور Optoma HD25e
FULL HD
3D
[IMG][/IMG]
وهذا الحامل للتعليق في السقف من نفس شركة الشاشة
[IMG][/IMG]
صورة للكاتلوج المصنع للشاشات
[IMG][/IMG]
وهذي مواصفات الشاشة وطبعا انا اخترت ان لون الشاشة يكون رمادي مش ابيض
[IMG][/IMG]
طبعا بتشوفون هنا ابعاد الشاشة اللي اخترها او مسطح العرض (230cm x129cm) والاطار اللاسود العلوي(cm35) اما باقي الحواف فعرض الاطار الاسود (5 cm )
[IMG][/IMG]
[IMG][/IMG]
وهذي صورة للفاتورة والاسعار بالزلوتي البولندي اللي يعادل 1.25 ريال سعودي . يعني تقريبا اجمالي المشتريات 7000 ريال سعودي
1: سعر الشاشة
2:حامل التعليق بالسقف
3: سعر البروجكتور
4: سعر التوصيل
طبعا لاننسى انهم مازعين الضرايب من ظهورنا ,بس يلا نتحمل
بس المشكلة حاليا ماني محصل احد يركبه لي لأن موسم اعياد الكرسميس وراس السنة وماحد فاضي لي يجي يركب
وان شاءالله بعد 10 ايام احصل لي احد يركبهم
[IMG][/IMG]
الشاشة راح تركب قدام الستارة هدي بس لازم لي اقص من الجيبسون بورد عشان اسوي لها مجال
[IMG][/IMG]
والبروجيكنور في الجهة المقابلة طبعا
الحين نجي لموضوع الصوت
طبعا حاليا افكر اشتري بكيج جاهز من شركة سامسونج لان موضوع التجميع احسه بيطلع غالي شوي ويمكن تكون فكره تطويرية للمستقبل
طبعا هذا النظام اللي اخترته SAMSUNG HT-F5550
[IMG][/IMG]
5.1 وبقوة 1000 W
فما ادري ايش تعليقكم ؟؟؟؟
وبعد ابي اخذ رأيكم في سلك HDMI لاني بصراحة محتار من كثرهم وما ادري شنو اخذ
بس حصلت هذا
[IMG][/IMG]
[IMG][/IMG]
ايش رايكم ؟؟
الحين انا خلصت التقرير المبدئي وانتظروني مع التقرير النهائي
ومره ثانية اعذروني على الصور اللي مش ولا بد بس اني متحمس وابي اشارككم وبنفس الوقت اخذ رايكم
لا تبخلون علي بنصايحكم
مشكورين
اقتباس
