طريقتي في تعتيم شباك الغرفة

[دمع القلب]

بسم الله الرحمن الرحيم




السلام عليكم ., كيفكم عساكم بخيـر


طبعـا يمكن تستغربون من العنوان لكن أساسها كانت مشكلة وتم حلها بمبدأ ( الحاجة أم الاختراع )




الوضع :
غرفة السينما مساحتها 5 * 4 على زاوية .. وفيها شباكين


المشكلة :
إضاءة الشباكين قوية في أوقات النهار وهذا مايخليني أستمتع بالأفلام
ملاحظة : شغلي نظام 3 ورديات ( شفتات ) يعني ماقدر أثبت على وقت معين لمشاهدة الأفلام .


الحل :
يمكن يقول بعضكم ركب ستاير وتنتهي المشكلة ... بقوله أنا ماحب الستاير لأنها تجمع غبار ولا تعطيك تعتيم كامل
ونفس الحكاية الستاير الخشبية وغيرها كلها ماحبها ..... وحليتها على طريقتي الخاصة .




نبدأ بسم الله :


هذي صورة الغرفة الساعة 9 صباحا وتلاحظون قوة الاضاءة وطبعا يعكس في الشاشة .







صورة الشباك من قريب







الأدوات اللي نحتاجها :


1- مشرط
2- مناديل
3- مفك عادي
4- لاصق من الجهتين
5- صحايف لون سود ( اللي يطلبونها المدرسين سابقا ) عدد 4 حبات بحكم عندي 4 شبابيك
6- متر قياس
7- مسطرة طويلة ( أنا مالقيت واستخدمت هالخشبة أهم شي يكون مستقيم )





1- ننزل الشباك الزجاجي






2- لاحظوا الربلات المطاطية






3- نفك بدايتها بالمفك






4- نسحبها الباقي باليد






5- ننظفها بالمنديل لأنها بتكون مغبرة أكيد




وهنا بعد مافكيت الأربعة كاملة






6- ناخذ مقاس المسافة بالطول والعرض اللي بين أطراف الالمنيوم






7- راح نحتاج بلاطة سيراميك كبيرة .. أنا عندي نفس الصورة






8- نجيب الصفيحة السوداء فوق السيراميك ونقص على نفس المقاسات
ملاحظة ( نزيد 2 سم على الطول والعرض عشان تكون اعرض واطول من المقاس الأصلي )






9- بعد ماقصينا الصفيحة واستخدمت الخشبة للقص بشكل مستقيم






10- لاحظوا عرض الصفحية أعرض من العرض الأصلي






11- بعدها ندخل الصفيحة داخل أطراف الألمنيوم نفس الزجاج .. نفس الصورة






12- بعدها نركب الربلات المطاطية مثل أول لكن هالمرة فوق الصفيحة
ملاحظة : وقت ماتضغط على الربل عشان يدخل جوا ثبت يدك الثانية على وسط الصفيحة عشان ماتنشد من جهة وجهة لأ




13- هنا بعد ماركبنا الربلات وصارت جاهزة ... ونعيد نفس الخطوات على باقي الشبابيك




الى هنا نكون خلصنا من الشبابيك وباقي علينا الأقواس ..


ركزوا معي بالكلام لأنه كلام ارتجالي <- صح علي يأهل النحوو


أنا بقى عندي قطعة كاملة تغطي القوس كله وأخذت طول القوس من تحت ( القاعدة ) وارتفاعها من وسط الطول الى أعلى نقطة في القوس
وزودت كم سنتيمتر عليهم وخاصة بالارتفاع لانه نازل تحت بس ماتشوفه ..
حطيت الصفيحة على الشباك وبديت اضغط عليها من فوق بأصابعي إلين تصير قريبة من القوس وثم أقصها بالمشرط .


هنا بعد ماضغط بأصابعي ... طبعا قصيت الزوايد بالشكل هذا عشان ماتلتوي الصفيحة معي






وهنا بعد ماقصيتها بالشكل المطلوب




بعدها نجيب المربعات اللاصقة من الجهتين




ونلصقه على صفيحة القوس بالشكل التالي




وبعدها نلصقها مضبوط .. واذا فيه مجال انك تدخلها بين الزجاج والالمنيوم يكون أفضل .




والقوس الثاني طلعت لي فكرة ثانية أفضل .. والسبب ماكان عندي صفيحة كاملة تغطيها <- ماقلت لكم الحاجة أم الاختراع


شوفوا الصورة ذي ... ولاحظوا انه فيه قطعتين ألمنيوم وبينهم حد فاصل ..
الحد هذا جاي بشكل مقوس نفس القوس الاصلي لكن أكبر شوي




طبعا في البداية تحمست بالشغل ونسيت أصور الخطوات .. وشرحت لكم بالكلام


القطع الاولى كانت طويلة لكن ارتفاعها قصير وركبتها من الجهة اليسار وخليت طرفها على نهاية الحد الفاصل بين القطعتين
وقصيت بالمشرط على امتداد الحد والنتيجة نفس التقوس المطلوب ..وثم ركبته ودخلته شوي بين الزجاج والالمنيوم


والقطعة الثانية نفس الطريقة ... ركبتها على الحد وقصيت على امتداده والنتيجة نفس التقوس العلوي


وبقى عندي جزء صغير على اليمين ... والصور توضح أكثر


جبت قطعة أكبر من المقاس المطلوب




وحطيتها على الحد .. وهنا أثناء القص بالمشرط




بعد ماقصيتها




القطعة جاهزة




لصقت عليها من المربعات اللاصقة وثم ركبتها






وكذا نكون انتهينا من الشغل وهذي صورة للشبابيك بعد الشغل ( اللمبات شغالة )





وهنا بعد ماطفيت اللمبات ... الساعة 12 ونص الظهر ( الفتحة على اليمين بسبب اني مدخل سلك الدش منها )






وهنا وقت مشاهدة فيلم ..






أتمنى يكون الموضوع أعجبكم وخفيف عليكم وما بربرت واجد بالكلام <- لا مو واجد


واستقبل النقد ( إن وجد ) قبل المدح ..


وبالتوفيق للجميع .


أخوكم / سعد

[MbtsM]

ماشاء الله طريقه ممتاز وعجبني شغلك ولكن كان يفضل تحط شباك خارجي اكتروني يغطي الضوء متى ماتبي الان ماستفت من الاضائه داخل الغرفه اذا احتجتها طبعا راح تزيد التكلفه اكيد
مجرد رأي
بارك الله فيك

[F H D]

فكرة بسيطة ورائعة .. فعلاً الحاجة ام الإختراع ..
تطبيقك روووعة و شغلك مرتب ونظيف ماشاء الله
يعطيك الف عافية اخوي سعد

[mz_milan]

يعطيك العافيه اخوي سعد موضوع جميل ومفيد لمحبي الظلام طوال الوقت

مايعاب على هالطريقه انها متعبه وايضا تمنع دخول الضوء وهذا غير جيد .. يعني كذا محد يشوف النور الا لمن يفك الشباك وهذا في بعض المدن ماينفع عشان الحر والرطوبه والغبار

ايضاً سلك الدش حول تخرمله خرم من نفس الالمنيوم للشباك نفسه من الجنب وتدخل السلك منه عشان تنفك من سالفة فتحة الشباك البسيطه الي تدخل عليك نور وغبار وهواء حار اذا كان الجو حار ورطوبه ايضاً

عساك عالقوه ياغالي على هالموضوع المميز

وفق الله الجميع

[ابو يمان]

يارجل ليش كل هذا . الستائر تعطي جمالية للغرفة وبعدين ظلمت الغرفة مرة .. وعشان الغبار يااخي كل شهرين نزلها و اغسلها وانتهى

[مزيد الدوسري]

فكرة رائعة الصراحه انا اعاني من المشكلة هذي وان شاء الله بطبق براءة اختراعك على اني مب جيد في الشغلات اليدوية ولكن على الأقل بحاول



شكرا اخوي على عرض تجربتك

[M B T 3 D]

شكرا ً سعد على عرض تجربتك الله يعطيك العافيه
انا كنت مسويها زمان بس ياخي الشمس ماعاد دخلت الغرفه حسيت حالي بتحول دراكولا
ركبت ستاره مانعه للشمس رخيصه قيمتها تقريبا ً 350 ريال تسحبها وتنزلها بحبل وركب فوقها ستاره عاديه وانتهى الموضوع

[mks_95]

الناس اللي يصنفون زيك قليل.. كذا واحد من أخوياي يحب يبتكر ولو كان شيئ بسيط إلا ان التنفيذ بحد ذاته يعتبر شيئ حلو.. والله عجبتني بشرحك بالتفصيل وسرد الصور,, وأشكرك لحرصك لفايدة غيرك ...<< موضوعك فيه دقة قوية للي شغالين يحطون تجليد أسود عالشبابيك ..

[ساهر جده]

الله يعطيك العافية مشالله تبارك الله شغل رائع والاحلى انك مسويه بيدك ومشالله بيد تقص ويد تصور حلو شغل مرتب ورائع بس على قول الشباب ترا الاضاءة الطبيعية جدا مهمة لكل الغرف لانه الاضاءة الطبيعية لما ماتدخل الغرفة تسوي مشكلة لانه تتربى دودة ناسي اسمها والله عندي عمي طلعت وترا ماترحم تاكل كل شي فلازم من التهوية الطبيعية وغير كدا فتحة الدش خرم لها في الالمنيوم في الطرف وبالتوفيق ان شالله شكرا للموضوع الرائع

[mks_95]

أي ديدان .. يطلع عثَة على الأقمشة في حال قلت النظافة/ضوء الشمس ولا مو..

[ساهر جده]

لاوالله ماهي عتة كدا لها اسم غريب اعتقد اسمها البز والله يابهدلته الين ماغير كل فرش البيت انت عارف يقولك انه لازم كل فترة تقلب المرتبة وتغير فراشك وتقلبه

[دمع القلب]

ماشاء الله طريقه ممتاز وعجبني شغلك ولكن كان يفضل تحط شباك خارجي اكتروني يغطي الضوء متى ماتبي الان ماستفت من الاضائه داخل الغرفه اذا احتجتها طبعا راح تزيد التكلفه اكيد
مجرد رأي
بارك الله فيك

الله يعافيك أخوي .. الشباك اللي تقصده اعتقد اسمه ( شتر ) وسعر المتر بـ 800 ريال حسب ماذكر وهو أفضل حل بالنسبة لي بس راح يكلفني مبلغ
أفضل إني استثمره في إكمال باقي مكونات الغرفة وبعدها ممكن أركبه .. لكن فيني عجلة .. وركبت براسي الا اشوف فيلم وهذا اسرع حل

فكرة بسيطة ورائعة .. فعلاً الحاجة ام الإختراع ..
تطبيقك روووعة و شغلك مرتب ونظيف ماشاء الله
يعطيك الف عافية اخوي سعد

الله يعافيك أخوي فهد .. هذا أهم مبدأ عندي

يعطيك العافيه اخوي سعد موضوع جميل ومفيد لمحبي الظلام طوال الوقت

مايعاب على هالطريقه انها متعبه وايضا تمنع دخول الضوء وهذا غير جيد .. يعني كذا محد يشوف النور الا لمن يفك الشباك وهذا في بعض المدن ماينفع عشان الحر والرطوبه والغبار

ايضاً سلك الدش حول تخرمله خرم من نفس الالمنيوم للشباك نفسه من الجنب وتدخل السلك منه عشان تنفك من سالفة فتحة الشباك البسيطه الي تدخل عليك نور وغبار وهواء حار اذا كان الجو حار ورطوبه ايضاً

عساك عالقوه ياغالي على هالموضوع المميز

وفق الله الجميع

الله يسلمك أخوي ميلان .. حاولت أخرم للاسلاك في الالمنيوم بس ريشة الدريل كانت تعبانة .. وأجلت الشغلة الين نسيتها
بالعادة اغطي الشبابيك بدون الأقواس لكن هالمرة كملتها عشان الشرح ويمكن الغي القوس الايسر لانه مايعكس على الشاشة
ويعطيك العافية ..

يارجل ليش كل هذا . الستائر تعطي جمالية للغرفة وبعدين ظلمت الغرفة مرة .. وعشان الغبار يااخي كل شهرين نزلها و اغسلها وانتهى

المسألة أذواق يابو ايمان وبصراحة ماحبيت الستاير والغبار والله انه معذبني بالبيت يبيلها كل اسبوع غسيل ..
أنا غطيتها بصفايح سوداء .. أقدر اغطيها بأي لون يعطي إنارة أخف على حسب اللون .. غرفة العزوبية أول مركب لها لون سمواي
يعطيك العافية ..

فكرة رائعة الصراحه انا اعاني من المشكلة هذي وان شاء الله بطبق براءة اختراعك على اني مب جيد في الشغلات اليدوية ولكن على الأقل بحاول

شكرا اخوي على عرض تجربتك

الله يسلمك أخوي مزيد .. اذا ماودك بظلام دامس .. غير لون الصفيحة لأي يلون يعجبك يخفف لك الإضاءة ويعطيك نفس اللون اللي تختاره
وعلى فكرة الشغلة كلفتني 14 ريال بدون مشرط

شكرا ً سعد على عرض تجربتك الله يعطيك العافيه
انا كنت مسويها زمان بس ياخي الشمس ماعاد دخلت الغرفه حسيت حالي بتحول دراكولا
ركبت ستاره مانعه للشمس رخيصه قيمتها تقريبا ً 350 ريال تسحبها وتنزلها بحبل وركب فوقها ستاره عاديه وانتهى الموضوع

الله يعافيك يارب .. أنا كنت مسويها بغرفتي سابقا بلون سماوي نفس لون البوية .. اضاءة خفيفة وحلوة
وهي ماهي مسألة قيمة الستاير بس أنا أحب اشتغل بنفسي وأعجبتني واذا غيرت رايك أطلق عليها البزارين ياكلونها أكل

الناس اللي يصنفون زيك قليل.. كذا واحد من أخوياي يحب يبتكر ولو كان شيئ بسيط إلا ان التنفيذ بحد ذاته يعتبر شيئ حلو.. والله عجبتني بشرحك بالتفصيل وسرد الصور,, وأشكرك لحرصك لفايدة غيرك ...<< موضوعك فيه دقة قوية للي شغالين يحطون تجليد أسود عالشبابيك ..

الله يعافيك أخوي .. كنك تشوفني أحب اشتغل بنفسي واستمتع بالشغل وبدايتها كانت من التجليد الأسود
عمي كان مجلد الشبابيك عنده ولما جاء يفكها تعال شف العذاب لو مفصل جديد أرحم له

الله يعطيك العافية مشالله تبارك الله شغل رائع والاحلى انك مسويه بيدك ومشالله بيد تقص ويد تصور حلو شغل مرتب ورائع بس على قول الشباب ترا الاضاءة الطبيعية جدا مهمة لكل الغرف لانه الاضاءة الطبيعية لما ماتدخل الغرفة تسوي مشكلة لانه تتربى دودة ناسي اسمها والله عندي عمي طلعت وترا ماترحم تاكل كل شي فلازم من التهوية الطبيعية وغير كدا فتحة الدش خرم لها في الالمنيوم في الطرف وبالتوفيق ان شالله شكرا للموضوع الرائع

الله يعافيك أخوي ساهر .. تعال شفني صرت كني اخطبوط وقت الشغل شكيت بعدد يدي
بصراحة ناسي سالفة الدودة خوفتني منها بس ولا يهمك .. بفتح الشباك كل فترة أهم شي مايكون فيه غبااار <- الرياض
وأنا في البداية بعدل أمور كثيرة بالغرفة لكن مع الوقت بإذن الله ..


وأحب انوه ان المسألة فكرة وليست حل مثالي .. اعتبرها حل مؤقت الين تضبط الأمور
ومن ناحية أخرى قد تفتح آفاق بالإبداع عند آخرين <- بررررى


دمتم بخير .,

[حافظ الود]

بصراحة فكرة مبتكرة وحل عملي وغير مكلف

إضافة لشرح راااائع وسلس للغاية

تقبل تحاياي وشكري وتقديري على الموضوع المميز

[mlakaaa3]

ما شاء الله عليك عندي اخوي جا بيغطي الشباك جاب قصدير وغطاه كله طلع قبيح .. لا مريت جمب الملحق يجهرك النور وقلت له ركب شتر ما طاع

[عبدالله الحازمي]

موضوع رائع ويحتاج تطبيق

[أبو الحسام]

أحسنت أخي.

ولكن عليك بملاحظة الأخ محمد وأخذها ف يالاعتبار من حيث الحفر بالشنيور لسلك الدش. يفضل ان يكون في الجدار نفسه على مستوى أرضية الغرفية.

أما بالنسبة للتضليل فلو انك فكرت بتركيب جلد أسود لاصق - نفس اللي يطلبونه المدرسين من الطلاب - ربما لكان اسهل. حيث لن تحتاج لفك الشباك وبالامكان قصه بسهولة أكبر وكذلك ستضمن التصاقه فترة اطول. وسيعمر معك على طول..

[Marauder28]

موضوع حلو ورايق والتفاصيل اعطت الموضوع نوع من الفخامه ... احسنت وبارك الله فيك على الطرح


انا سبق وعملت نفس طريقتك ولكن بتجليده مخمل اللي يبيعوها المكاتب قص وألصق وتعطي تعتيم 100% وبرضول المخمل يعطيك فخامه


بالتوفيق لك ولا تحرمنا من مثل هالمواضيع الحلوه

[دمع القلب]

بصراحة فكرة مبتكرة وحل عملي وغير مكلف

إضافة لشرح راااائع وسلس للغاية

تقبل تحاياي وشكري وتقديري على الموضوع المميز

الله يعطيك العافية أخوي ., منور الموضوع بوجودك

ما شاء الله عليك عندي اخوي جا بيغطي الشباك جاب قصدير وغطاه كله طلع قبيح .. لا مريت جمب الملحق يجهرك النور وقلت له ركب شتر ما طاع

الله يسلمك .. أمااا قصدير أكيد الشتر افضل

موضوع رائع ويحتاج تطبيق

الأروع وجودك تسلم ياعبدالله

أحسنت أخي.

ولكن عليك بملاحظة الأخ محمد وأخذها ف يالاعتبار من حيث الحفر بالشنيور لسلك الدش. يفضل ان يكون في الجدار نفسه على مستوى أرضية الغرفية.

أما بالنسبة للتضليل فلو انك فكرت بتركيب جلد أسود لاصق - نفس اللي يطلبونه المدرسين من الطلاب - ربما لكان اسهل. حيث لن تحتاج لفك الشباك وبالامكان قصه بسهولة أكبر وكذلك ستضمن التصاقه فترة اطول. وسيعمر معك على طول..

الله يسلمك يارب .. أكيد باذن الله بحفر للسلك قريبا
بصراحة ماطرت الفكرة على بالي .. بس أنا ماحب أي شي يلصق لإنه اذا نويت تشيله بيتعبك كثير ..
فكرت أجلد الصفايح بتجليده شفافة قبل لاركبها عشان تكون أقوى وأحسن منظر بس ماكانت متواجدة وكملت الشغل

موضوع حلو ورايق والتفاصيل اعطت الموضوع نوع من الفخامه ... احسنت وبارك الله فيك على الطرح


انا سبق وعملت نفس طريقتك ولكن بتجليده مخمل اللي يبيعوها المكاتب قص وألصق وتعطي تعتيم 100% وبرضول المخمل يعطيك فخامه


بالتوفيق لك ولا تحرمنا من مثل هالمواضيع الحلوه

الله يبارك فيك يارب .. فعلا المخمل أفخم في الشكل والعمل .. بس يعيبه اللصق .. ولا تستبعد اجيبه والصقه فوقه

[نادر البلوي]

الله يسعدك .. والله الاسلوب بحد ذاته شيق.. والطريقة للحل ممتعه وانا كنت احط قصدير خلف الشباك (الجهة اللي برا ) ولكن عندنا بجنيف ^^ اقصد بتبوك اجواء مغبرة وهوا يمشي 10 الاف وكنت اعاني من تمزق القصدير ومرات يطير وهذا وجه الضيف (:
طريقتك اكثر دقة واكثر اناقة الله يعطيك العافية

[aalrodan]

تذكرني بأيام الجامعة .. الواحد ما يحلى له النوم الا لما تطلع الشمس ..
بس كنا نستخدم طريقة أخرى .. و هي وضع قصدير ثم ورق الصحايف . لون أبيض .. و بهذا تنعكس أشعة الشمس افضل من لون اللون الأسود ..
و الله يعينك على الشفتات ..